བརྒྱ་བྱིན་གྱི་ཆིབས་གླང་།

 ཡ་དབའེ། མདང་བཞག་ ང་ཇོ་མོ་གཙང་ཁ་ལུ་འགྱོཝ་ད་ ཁྱོད་ཚུ་ལུ་ བརྒྱ་བྱིན་གྱི་ ཆིབས་གླང་གི་སྐོར་ལས་ སླབ་བརྗེད་སོང་ནུག

མ་པ་ སླབ་མ་སླབ་རང་ དོན་དག་མི་འོང་། ཨིན་རུང་ དེ་ཁར་གྱི་མི་ཚུ་གིས་ སླབ་དོ་བཟུམ་འབད་བ་ཅིན་ སྤུ་ན་ཁ་རྫོང་ཅུང་གི་སངས་རྒྱས་བཟུམ་སྦེ་ སྨོན་ལམ་གང་བཏབ་ཨིན་ལོ།

དེ་འབདཝ་ད་ ཕར་བཟུམ་སྦེ་ ལགཔ་གཉིས་ཐལ་མོ་སྦྱར་སྦེ་ སྨོན་ལམ་བཏབ་ནི་མེན་པ་བཞིན་ན་ ནཱ་གི་འདི་རོགས་ ཆིབས་གླང་གི་རྣམ་ཅོ་ཁར་ རང་གི་ཨམ་སྲུ་དཀྲོགས་དོ་བཟུམ་སྦེ་ བུ་རུ་སུ་རུ་ སླབ་དགོ་བས།

དེ་ཚེ་འབདན་ ང་གིས་ཡང་ བུ་རུ་སུ་རུ་ཅིག་གཏང་ཡི། ཁོ་ལུ་ ཡ་ བརྒྱ་བྱིན་གྱི་ཆིབས་གླང་། ད་སྨོན་ལམ་མི་བཏབ་སན྄་ བོད་ལྷ་ས་འགྱོ་ ཇོ་བོ་མ་མཇལ་བར་ བློ་བཙོང་འོང་། སྨོན་ལམ་བཏབ་གེ་ཟེརན྄་ ག་ཅི་བཏབ་ན་ཡང་མི་ཤེས་བས། 

ཚེ་གི་དངོས་གྲུབ་ཞུ་གེ་སན྄་ ཚེ་དཔག་མེད་སེམས་ཤི་འོང་། ཤེས་རབ་ཀྱི་དངོས་གྲུབ་ཞུ་གེ་སན྄་ ད་ལྟོ་ཚུན་ འཇམ་དཔལ་དབྱངས་ཀྱིས་གནང་སྟེ་ཡོད། འཕྲད་བསྟེན་གྱི་དངོས་གྲུབ་ཞུ་གེ་ཟེརན྄་ སངས་རྒྱས་སྨན་ལྷ་གིས་ རྒྱབ་རང་སྤང་མ་བཏུབ།

ད་གཙོ་བོ་རང་ རྒྱུ་གི་དངོས་གྲུབ་ ཛམ་བྷ་ལྷ་གིས་འབད་རུང་ གནང་མ་བཏུབ། ཡུམ་རྗེ་བཙུན་གྱིས་ཡང་ ཁ་བཟེད་མ་བཏུབ། དེ་དང་ ཅོག་རང་འཐདཔ་སྦེ་ བུམོ་འཇའ་རིསམོ་གི་དངོས་གྲུབ་ ཅིག་ ག་ལས་ཡང་ འབྱུང་མ་སྲིདཔ་ལས་ ཆིབས་གླང་གིས་ བཀའ་དྲིན་བསྐྱང་གནང་ཟེར་ཞུ་ཡི།

ཏེ་ ཨིན་མས་རོགས་ ད་རེས་ དྲོ་པ་ཆུ་ཚོད་ཕྱེད་དང་དགུ་ལུ་ ང་ཡིག་ཚང་འགྱོ་བའི་ལམ་ཁར་ བུམོ་འཇའ་རིསམོ་ཅིག་དང་ ཕྱེད་ཅི། ང་བལྟན྄་ བརྒྱ་བྱིན་གྱི་ སྲསམོ་རང་གཏང་དཔ་ བཟུམ་འདུག

ད་ནངས་པ་ལས་ ཨ་རྟག་རང་ དུས་ཚོད་དེམ་ཅི་ཁར་ འགྱོ་དགོཔ་བཟོ་ཡི་མས།

དེ་འབདཝ་ད་ རྒྱུ་གི་དངོས་གྲུབ་འདི་ མིན་འདུག་སྨ་རེ། འཐོབ་ནི་ཨིན་མི་ཡང་ འབྱིད་ཡར་སི་དབའེ། ག་ཅི་སེམས་དང་མ་ལྡན་ག་ མ་ཤེས།